1. Mee

Den Dag vun der Oarbecht, den Oarbechter*Innen an de Rechter vun der Oarbecht gëtt och traditionell am Photo-Club Esch gefeiert. D'Zesummestrécke vun engem Meekranz gehéiert do natierlech och dozou.

Sou wéi d'lescht Joer och, huet déi Traditioun leider missten op Äis geluecht gi wéinst der COVID-19 Pandemie. Wuelgemierkt, als Gruppenaktivitéit. Vereenzelt Membere sinn ënnert sech mat hire Familljen, an ënnert den aktive sanitäre Moossnamen, an de Bësch gaange fir ee Meekranz ze maachen an dem Dag ze gedenken.

Dat nächst Joer hoffe mär erëm esou feieren ze kënnen, wéi d'Memberen hei op der Foto 1982.

Challenger

Virun engem Joer, wärend den éischte Wochen a Méint vun der #BléiftDoheem Campagne vun der Santé, hu mär eis iwwerluecht wéi d’Veräinsliewen trotz den néidege sanitäre Mesurë weider gestäerkt kéint ginn.

D’Iddi vum éischte “PCE Challenge” woar gebuer. D’Objektiver fir d’Liewen am Veräi weider ze ënnerstëtzen, sech selwer an enger anerer Spart vun der Fotografie ze probéieren, déi nei bäistousse Memberen an d’Fotografie anzeféieren an keng Kompetitioun ze hunn, sinn all mat Freed an Erfolleg areecht ginn.

Ee Joer dono si mär an enger änlecher Situatioun wat déi sanitär Mesuren ugeet. Vue dass de Challenge sech als eng effikass Method bewisen huet, si mär mat folgende Kategorien an déi zwee Iteratioun gestart: “Low-Key”, Minimalismus, Monochrome, Abstrakt a “Pure” Fotografie.

An Zukunft wäert de Konzept den Numm Challenger droen an och zu engem Haaptbestanddeel vum Programm vum Photo-Club Esch ginn. Awer ze vill verroden doe mär op dëser Plaz nach net.

Weider Detailer sinn nom 8. Juni online op pce.lu/challenger an an engem vun den zukünftege Périodiquen ze fannen.

Generalversammlung 2021

Esou hätt d'Generalversammlung 2021 kënnen ausgesinn. Trotz der Méiglechkeet d'Optioun gehat ze hunn, hu mär eis als Veräin awer anescht entscheet an se komplett ouni Masken, dofir awer mat digitalem Oafstand via Videokonferenz oafgehalen.

Déi eng Säit woar esou kee Risiko vun enger COVID-19 Ustiechung, déi aner Säit hätt eis soss an 10 Joer kee gegleeft, dass mär och an der éischter Pandemie vum 21. Joerhonnert dobäi gewiescht wären, wann mär net op mannst eng gréisser (General)Versammlung op réng digitalem Wee gehat hätten.

Fir et all Participant esou angeneem wéi méiglech ze maachen, huet sech d'Keynote vun dësem Joer op dat aller néidegst fokusséiert – fir déi Leit mat keng esou héijer Bandbreet net och nach dee leschte Bit aus dem Video ze quëtsche – woubäi e puer Fotoe vum Joer awer natierlech net gefeelt hunn.

No engem Réckbléck op d'Joer 2020, ass och de Finanzrapport virgestallt ginn. De Comité ass zum Deel nei gewielt ginn a setzt sech fir den Exercice 2021 wéi folgend zesummen:

• Marcel Braun
• Juliane Duhr
• Jan Guth
• Karin Herz
• Joseph, genannt Jupp, Rinaldi
• Yannick Schiltz
• Pol Wadlé

Uschléissend huet d'Präsidentin vun der Escher Kulturkommissioun, d'Daliah Scholl, als Vertriederin vun der Escher Gemeng ee wäertvolle Bäitrag, motivéierend a luewend Wierder fir d'Oarbecht vum Photo-Club Esch zum Ausdrock bruecht.

Ee grousse Merci heivir.

Oafschléissend ass et nach eng allgemeng philosophesch Diskussioun ginn.

Op dëser Plaz nach ee Mol een grousse Merci un all eis Member:innen an Ënnerstëtzer:innen déi eis duerch d'Joer 2020 begleet an op der Generalversammlung 2021 deelgeholl hunn.

E weidere Merci gëllt och der Press, déi och an dësem Setting mam Paul Huyvrechts vum Tageblatt Lëtzebuerg an dem Pierre Mousel vum d'Lëtzebuerger Wort present woar.

Presse Artikelen

• Tageblatt Lëtzebuerg – Generalversammlung via Zoom: Der Photo-Club Esch trotzt der Pandemie (Paul Huybrechts)
• Lëtzebuerger Wort – Corona vermasselt 100-Jahr-Feier: Photo-Club verzeichnet beträchtlichen Mitgliederzuwachs (Pierre Mousel)

Réckbléck 2020

Dat mannst wat ee wuel vum Joer 2020 soe kann, ass dass et spannend woar. D'Realitéit fir eis als Photo-Club Esch woar net vill anescht wéi fir vill aner Veräiner och: Annulatiounen, Réckele vun Evenementer an Aktivitéiten, Upassungen do wou se méiglech woaren an sou weider.

All Kris huet awer seng positiv Säit, och wann se heiansdo schwéier auszemaachen ass. An dësem Fall woar et sécherlech zum Deel eng Entschleunegung fir Mënsch an Natur. Eng Realitéit déi sech och an eisem interne Foto Challenge wärend dem éischten "Confinement" bei eise Memberen an de Biller zeréckgespigelt huet.

Aktivitéiten

Déi Aktivitéiten déi mär 2020 ze verzeechnen hunn, bezéien sech logescherweis op déi éischt zwee an d'hallef Méint, wéi och déi puer Wochen am Summer no dem "Confinement". Mär konnten eisem Salon d'Auteurs mat der 26ter Editioun trei bléiwen an haten och immens groussen Erfolleg mat eiser Expositioun »An den Déifte vum Minett« an der hauseegener Galerie Permanente d'Art Photographique.

Iwwert d'Joer hu mär fënnef Périodiquen trotz allem gutt mat Inhalt gefëllt, nei gelayouted a verschéckt kritt.

Allgemeng hate mär 68 Aktivitéiten am Veräinslokal op der Resistenzplaz a 5 fotografesch Sortien duerch Esch an d'Natur ronderëm. Kleng Renovatiounen an Ëmännerunge fir den Infektiounsrisiko weider eroaf ze drécken, wéi och Erneierunge vun der digitaler Infrastruktur sinn och ëmgesat ginn.

Op der Escher Kulturnuecht (Nuit de la Culture), wéi och op den anere kommunalen Zeremonien an Evenementer hunn eis Memberen d'Stëmmungen agefaangen.

Niewent enger ganzer Rëtsch un individuellen a Partneraktivitéiten, sinn och nach 500 Stonne vu vereenzelte Memberen an d'Preparatioun vun de Centenaire's Feierlechkeeten investéiert ginn, déi den 8. Juni 2021 am Escher Theater uloafe wäerten.

Ass d'Veräinsliewe dann och digitaliséiert ginn?

Deels deels. Mär versichen eiser Traditioun als Veräi wat d'Treffen ausserhalb vum reng digitale Raum sou gutt et geet trei ze bléiwen. Wann d'sanitär Mesuren an d'Infektiounszuelen et erloabt hunn, hu mär eis am jeeweileg méigleche Kader am Veräinslokal oder dobausse getraff.

Déi Zäit wou dat net méiglech woar, hu mär eis Memberen encouragéiert déi Zäit ze notze fir ze fotograféieren, sief et dobaussen oder an den eegene véier Wänn. D'Material vum Club stoung natierlech all Member zu Verfügung a konnt och op Ufro Heem geliwwert ginn.

D'Zäit fir d'Biller ze kucken an ze diskutéieren, ass och nach iwwert déi nächst Méint méiglech. Esch awer an dëser aussergewéinlecher Situatioun vun dem leschte Joer ze fotograféiere, woar an ass eenzegoarteg.